Anvar Obidjon

Anvar Obidjon
Tavalludi	1947-yil 25-yanvar Farg‘ona viloyati, Oltiariq tumani, Poloson qishlog‘i
Vafoti	11-aprel 2020-yil(2020-04-11) (73 yoshda) Toshkent shahri
Fuqaroligi	SSSR → Oʻzbekiston
Taʼlimi	Toshkent davlat universiteti
Kasbi	Shoir, yozuvchi, jurnalist
Faoliyat yillari	1974—2020
Unvoni	Oʻzbekiston xalq shoiri
Mukofotlari

Anvar Obidjon (1947-yil 25-yanvar — 2020-yil 11-aprel) — Oʻzbekiston xalq shoiri, yozuvchi va jurnalist.

Hayoti

Anvar Obidjon 1947-yilning 25-yanvarida Farg‘ona viloyati Oltiariq tumanining Poloson qishlog‘ida tug‘ilgan. Oʻrta maktabda oʻqib yurganida „Gʻuncha“ jurnalida „Shkafjon“ nomli birinchi sheʼri bosilgan (1960). Obidjon 1964—1966-yillarda Samarqand moliya texnikumida, 1973—1979-yillarda Toshkent davlat universitetining jurnalistika fakultetida sirtdan oʻqigan.

Harbiy xizmatni oʻtagach (1966—1969), qishlogʻida „Nurobod“ jamoa xoʻjaligida dala hisobchisi boʻlgan (1970—1971), tumandagi „Paxta uchun“ gazetasida adabiy xodim, boʻlim mudiri (1971—1976), Toshkentdagi yogʻ-moy kombinatida bogʻbon (1977—1978) sifatida ish olib borgan.

1981—1986-yillarda „Kamolot“ nashriyotida muharrir, bosh muharrir oʻrinbosari, 1986—1987-yillarda „Yulduzcha“ nashriyotida bosh muharrir, 1988-yilllarda „Yosh kuch“ jurnalida adabiy xodim, 1988—1989-yilllarda „Mushtum“ jurnalida boʻlim mudiri, 1989—1998-yillarda „Choʻlpon“ nashriyotida bosh muharrir, direktor boʻlib ishlagan.

Anvar Obidjon 2020-yil 11-aprel kuni Toshkent shahrida 74 yoshida vafot etgan.

Ijodi

Anvar Obidjon „Ona Yer“(1975), „Olovjon va uning doʻstlari“ (1983), „Bezgakshamol“ (1985), „Akang qaragʻay Gulmat“ (1987), „Oltin yurakli Avtobola“ (1986), „[lamazon va Gulmat xangomasi“ (1992), „Meshpolvonning janglari“ (1994), „Oltiariq hangomalari“ (1999), „Odobli boʻlish osonmi?“ (2001), „Meshpolvon“ (2003) singari 25 ta toʻplamini chop ettirgan. Aksariyat asarlarini bolalarga bagʻishlagan.

„Meshpolvon“ asari asosida „Dahshatli Meshpolvon“ filmi suratga olingan.

Mukofotlari

Anvar Obidjon 1997-yil „Shuhrat“ medali; 1998-yilda „Oʻzbekiston xalq shoiri“ unvoni; 2011-yilda „Fidokorona xizmatlari uchun“ ordeniga sazovor boʻlgan.

Asarlari

• Alamazon va Gulmat. T.: „Choʻlpon“, 1998-yil.
• Juda qiziq voqea. T.: „Choʻlpon“, 1997-yil.
• Ketmagil. T.: Adabiyot va sanʼat nashriyoti, 1985-yil.

Adabiyotlar

• Said Ahmad. Fargʻonada bittagina „Xalq soʻzi“. 2000-yil 19-aprel
• Rahmon Qoʻchqor. Ajabtovur idrok usuli. „Fidokor“, 2000-yil 20-iyul.
• Lola Zvonareva. Vsegda v jizni. „Detskaya literatura“ Moskva, 1988-yil