Mahmudjon Tojiboyev

Mahmudjon Tojiboyev
Tavalludi	25-noyabr 1957-yil Fargʻona
Vafoti	11-iyul 2020-yil(2020-07-11) (62 yoshda) Toshkent
Mukofotlari	"Oʻzbekiston xalq hofizi" (2000) „Mehnat shuhrati“ (2018)

Mahmudjon Gʻoziyevich Tojiboyev (1957.25.11, Quva tumani – 2020.11.07, Toshkent) – xonanda va sozanda (tanbur, sato), Oʻzbekiston xalq hofizi (2000). Nozik didli, dardli, keng diapazonli ovoz sohibi. Toshkent konservatoriyasini tugatgan (1984). Qoʻshiq aytishni dastlab E. Mamatov, Gʻ. Hojiqulovdan, keyinchalik xrfizlik anʼanalarini O. Otaxonov, O. Alimahsumov, O. Hotamov va F. Mamadaliyevdan oʻzlashtirgan, sozandalik sirlarini T. Alimatovdan oʻrgangan. Yu. Rajabiy nomidagi „Maqom“ ansambli yakkaxoni (1984-yildan), Oʻzbekiston davlat konservatoriyasi dotsenti (2000-yildan). Repertuaridan Shashmaqom („Saraxbori Navo“, „Saraxbori Dugoh“, „Moʻgʻulchai Segoh“, „Navroʻzi Sabo“, „Nimchoʻponiy“ va boshqalar) va Fargʻona—Toshkent maqom yoʻllari („Dugoh“, „Chorgoh“, „Ushshoq“, „Shahnozi Gulyor“, „Bayot“ va boshqalar), katta ashula („Yovvoyi Chorgoh“, „Yolgʻiz“, „Ey dilbari jononim“ kabi), mumtoz („Topmadim“, „Asiriy“ va „Ldoiy“, „Chorzarb“, „Bozurgoniy“) va 20-asr bastakorlari („Keldik“, „Nazzora qil“, K. Jabborov; „Kezarman“, F. Toshmatov; „Jonim erursan“, M. Murtazoyev; „Dilrabolar“, O. Nuriddinov;"Bu oqshom", O. Hotamov va boshqalar) asarlari urin olgan. T. shoirnafas hofiz boʻlib, ijro uslubi vazminligi, lirikaga moyilligi, ovoz va cholgʻu mutanosibligi bilan ajralib turadi. Osiyo, Amerika, Yevropa va Shimoliy Afrika mamlakatlarida gastrodda boʻlgan. Yunus Rajabiy nomidagi Respublika makom ijrochilari tanlovi gʻolibi (1987).

Unvon va mukofotlari

• Oʻzbekiston xalq hofizi (2000-yil)
• Mehnat shuhrati ordeni (2018-yil)
• Fidokorona xizmatlari uchun ordeni (2021-yil);