Lao-szi

Lao-szi (xitoycha, aynan — keksa ustoz) (miloddan avvalgi 604, Chu podshohligi, Xenan viloyati — Xitoydan tashqarida juda keksayib vafot etgan) — xitoy faylasufi Li Erning faxriy nomi. U daosizmga asos solgan. Konfutsiy bilan bir qatorda turadigan buyuk xitoy mutafakkiri hisoblanib, uni yoʻl va yaxshi fazilatlar haqidagi qadimiy xitoy risolasi — "Lao-szi" ("Dao de szin") muallifi deb biladilar. Bu kitob qadimiy xitoy asarlariga qaraganda eng koʻp chet tillarga tarjima qilingan. Unda Lao-Szi Eaoni inson his-tuygʻulari bilan bilib boʻlmaydigan hamma narsaning asosi deb hisoblaydi. Lao-Szi taʼlimotida tabiatdagi barcha narsalar oʻzgarib turadi, lekin muayyan bosqichga erishgach, oʻzining aksiga qaytadi. Binobarin, kishilar xatti-harakat, intilish, kurashlardan voz kechishlari, ortiqcha sarf-harajat, hashamatga yoʻl qoʻymasliklari, yashash tarzini esa oddiylik, soflik belgilashi lozim.